Riemelmeester Malde sabbelt Dummtüüg (un dat bannig gau!), krakeelt in’t Megaphon, haalt allens ut sien lütten Synthesizer un jumpt dorbi in’n Takt up un daal.

Kommodige Jaykopp smiet vun Achtern digge Beats ut sien elektroonsch Schrievmaschin in’n Ruum, driggt ‘n Diskokugel nich bloots in’t Hart, man ok up’n Kopp, un produtscheert bassig-wuchtigen Spreekgesang.

Plietsche Torbän hett ‘n IQ vun nich weniger as 127, kann as eenzigste ut de Band würklich singen, is bannig smuck un maakt mit de een Hand Alarm up Becken or Drummachine, wieldes he in’e annere de Zigarett parkeert, de he an’t Smöken is.