Moin Lüüd!

Düt Johr weer teemlich rohig un dat is ok goot so. Denn: Wi mööt all rohiger warrn. Un: Tokamen Johr is ok noch ‘n Johr. Wi wüllt nu nicht to veel verraden, aver dat warrt noch kurios! Versproken! Bloots so veel: De Ollnborger Stadthall is ok an den tösätzlichen Termin kumplett utverköfft, wi höögt us up de Schleswig-Holstener Perlen Joldelund un Husum, Upnahmen sünd in de Maak un wi köönt mit rennomeerten Priesen reken. De Infos dorto gifft dat, wenn dat so wiet is! Wi sünd up jeden Fall bannig on feier un ji weet Bescheed!

Dat, wat passeert is, hett us wohnsinnig veel Spaaß maakt! ‘N lütte, man bannig feine Tournee hett us na Hamborg, Ollnborg, Berlin, Norderstedt un ‘n poor Mol na Bremen föhrt un us ü.a. mit dat Jeans Team un mol wedder mit Testsieger un Anda tohoopbracht. Gängeviddel, Överseefestival, Kiki Blofeld, Lila Uul, Polyester, Lannsgoornschau, MC Oceana – dank ok, dor nich för, weer echt mega!

Wat de Medien angeiht, hebbt wi us 1. nakelt maakt as noch nienich vördem för dat Musikland Niedersachsen, MTV-Cribs-Stlye, hett de Riemelmeester 2. ganz ehrlich seggt, woans dat utsüht (“Use Proven sünd öffentlich – wi nöömt jem Uptritten”), un finnt 3. ok de UniSPIEGEL, dat wi den Mob in Greep hebbt.

Tolest noch diggen respect an den plattdüütschen Räpper, den wi in’n Momang an’n leevsten hebbt: BLOWM ut Em! Wenn wi dorför de Tiet hebbt, disst wi villicht ok mol krass trüch, so to’n Bispill: Wi hebbt BLOWM funnen, in us Schiethuus!

Nu denn, bit tokamen Johr! Joon

De fofftig Penns

Update: De De-fofftig-Penns-Sommer-2011-Tournee nu noch beter!! Bito kummt noch ‘n Termin: Sünnovend, den 03.09., in’t Berliner Kiki Blofeld! Wokeen kann sik noch op’t verleden Johr besinnen? Mehr gode Nahrichten: In Ollnborg maakt wi tohoop mit de smucken Jungs vun Anda Musik!

De fofftig Penns warrt in noorddüütschen Teenie-Kajüten al länger den plattdüütschen Hip-Hop siene Rolling Stones nöömt. Dormit dat ok wiederhen gellen deit, gaht wi regelmatig up Afscheeds- un Comebacktour. Un nu is dat endlich wedder so wiet:

Na acht Maanden, de wi nich up de Breed stahn hebbt, de de plattdüütsche Bühn bedüden doot, warrt wi vun Enn Augustmaand af an wedder use allerleefsten Städer ‘n beten sekerer maken.

In Hamborg warrt wi den tweeten Geboortsdag vun’t Gängeviddel fieren, in Bremen bi’t Överseefestival jüst vör dat wunnerbore Jeans Team Larm maken un bi’t kunstdewelt-Festival tohoop mit de Testsiegers de Lila Uul gröön un blau spelen.

Denn geiht dat na use drüdde Heimat Ollnborg, woneem wi endlich wedder in’t Polyester to Gast ween dröfft. Wi besinnt us leider nich mehr an den eersten Besöök in’t Johr 2010, aver denn hett dat wohrschienlich teemlich veel Spaaß maakt.

So, nu freut wi us eersmol bannig up jo un sünd sülvst al düchtig gespannt, wat wi ok wat Ne’et mitbringen doot. Or lever as de Rolling Stones bloots up dat trüchgriept, wat sik al ehrder as goot wiest hett…

Bit denn.

Joon
De fofftig Penns

26.8. Hamborg – Gängeviddel-Jubiläum
27.8. Bremen – Överseefestival (ü.a. mit Jeans Team)
03.9. Berlin – Kiki Blofeld
09.9. Bremen – kunstdewelt-Festival in de Lila Uul (mit Testsieger)
10.9. Ollnborg – Polyester (mit Anda)

Moin Deerns!

Hier weer wedder wat los… Dor maakt een eenmol un verdeent Kreativ-Foffteihn, jümmers noch bit to’n Sommer, man de Medien laat een nich to Roh kamen. ‘N fix Tosamenfaten:

• Slurigen Artikel up SPIEGEL ONLINE!
• Gediegen Interview mit Kommodige Jaykopp up BREMEN4U!

Dat weer’t in’n Grunn ok al wedder. Vunwegen de Vullstännigkeit un veel to laat hebbt wi denn noch ‘n Wohnsinnsartikel vun’n letzten Sommer för jo, UT SYKE!

Butendem köönt wi stolt vermellen, dat Wikipedia us ok up Hooch för relevant verklort hett. ‘N anonymen un, as dat lett, bannig kumpetenten User hett düssen feinen Artikel upsett: KLICK!